Þingmenn þurfa ekki að hafa bindi

Þingmenn þurfa framvegis ekki að vera með bindi eða slifsi í ræðustól á Alþingi. Nýir alþingismenn sátu á skólabekk í allan dag og kynntu sér starfsemina, siði og reglur.

27 þingmenn taka sæti á Alþingi í fyrsta sinn þegar þing kemur saman á föstudag. Nýliðarnir sátu á skólabekk í allan dag til að kynna sér reglur og starfsemi alþings.

„Ég er dálítið spennt. Það er dálítið skrítin tilfinning að ég sé að byrja í nýjum skóla og nýrri vinnu á fimmtugsaldri," segir Lilja Mósesdóttir hjá VG.

„Þetta er spennandi og áhugavert viðfangsefni. Þetta er svona verkefni sem þarf að vinna og alltaf þegar maður þarf að byrja á einhverju nýju þá er það mjög spennandi. Ég held að þetta verði gaman," segir Þór Saari hjá Borgarahreyfingunni.

Forsætisnefnd Alþingis hefur ákveðið að þingmenn þurfi ekki lengur að vera með bindi eða slifsi í þingsal eða ræðustól.

Ekki eru þó allir sáttir við breytinguna.

„Mér líst ekkert sérstaklega vel á það. Ég held að það sé alveg tilefni til að setja upp slifsi þegar maður fer upp í eða inn í sal í löggjafarasamkundinni, það er ekki til of mikils mælst," segir Tryggvi Þór Herbertsson hjá Sjálfstæðisflokki.

Ásmundur Einar Daðason, er yngsti þingmaðurinn, 26 ára gamall. Þegar Stöð 2 sótti hann heim í síðasta mánuði átti hann eftir að kaupa sér jakkaföt.

Ertu búinn að kaupa jakkaföt?

„Já ég fór og keypti mér ein jakkaföt í síðustu viku en ég geri jafnvel ráð fyrir því að fá mér önnur."

Dýr jakkaföt? „Alltof dýr. Nokkur dilkssverð," sagði Ásmundur Einar.