Carew vill enda ferilinn með Villa

Norðmaðurinn John Carew er afar ánægður í herbúðum Aston Villa og hann vonast til þess að spila með liðinu þar til hann hættir í fótbolta.

Carew kom til félagsins frá Lyon árið 2007 og hefur slegið í gegn hjá stuðningsmönnum Villa.

„Ég elska lífið hérna. Elska fótboltann, félagið og stuðningsmennirnir hafa verið stórkostlegir. Ég mun aldrei gleyma þeim," sagði Carew.

„Ef eitthvað kæmi fyrir og ég þyrfti að hætta í fótbolta á morgun þá myndi ég samt elska stuðningsmennina. Ég á vonandi nokkur góð ár eftir og vonandi get ég bara klárað feril minn hérna."