Pensím gæti nýst í baráttunni gegn svínaflensu

Niðurstöðu er að vænta á næstunni á því hversu vel íslenska efnið pensím virkar gegn flensuveirum, en vonast er til að það geti jafnvel hjálpað í baráttunni gegn svínaflensu. Sænskt lyfjafyrirtæki ætlar á næsta ári að setja á markað sótthreinsivörur úr efninu sem eiga meðal annars að gagnast þeim sem eru með flensu.

Pensím er unnið úr ensími sem finnst í meltingarfærum þorsks en það hefur hingað til verið notað í smyrsl sem vinnur gegn húðmeinum. Niðurstöður rannsókna á síðustu árum benda til að það geti unnið á flensustofnum sem herja á menn. Tilraunir með efnið hafa hingað til aðeins verið gerðar í tilraunaglösum á tilraunastofum. Á næstu vikum er hins vegar fyrstu niðurstöður væntanlegar á því hvernig efnið virkar í raun og veru á húð fólks.

Jón Bragi Bjarnason, prófessor í lífefnafræði við Háskóla Íslands og forstjóri Ensímtækni, er vongóður á að niðurstöðurnar verði jákvæðar. Flest bendi til að efnið virki en það hefur gefið góða raun þegar það hefur verið notað í munni og öndunarvegi.

Rannsóknir hafa sýnt að pensím drepur meðal annars flensuveirur af stofninum H3N2 sem herjar á menn. Jón Bragi er vongóður á að ef niðurstöðurnar sem beðið er eftir verða jákvæðar þá verði jafnvel hægt að nota pensím sem vopn í baráttunni gegn svínaflensu. Það gæti þá hjálpað við að gera sjúkdóminn mildari og hraðað bata.

Á næsta ári mun sænska fyrirtækið Ensímmatika hefja sölu á sótthreinsivörum úr pensími fyrir þá sem eru með flensu eða óttast að fá hana. Um húðvörur er að ræða sem verða ekki seldar sem lyf.