Ragnhildur gerir mynd um fíkla

Fjölmiðlakonan Ragnhildur Magnúsdóttir hefur fengið handritsstyrk frá Kvikmyndasjóði Íslands vegna heimildarmyndarinnar Fíkill.

„Ég fékk lítinn, sætan handritsstyrk í sumar og var að dútla mér við þetta en hugmyndin var búin að veltast um í hausnum á mér lengi,“ segir Ragnhildur. Myndin fjallar á óhefðbundinn hátt um nokkra einstaklinga sem áttu við fíkniefnavanda að stríða en náðu að snúa lífi sínu við. Áður hefur Ragnhildur búið til heimildarmyndina From Oakland to Iceland sem fékk fínar viðtökur. Hún fjallar um ferðalag plötusnúðsins Dj Platurn, bróður Ragnhildar, til Íslands eftir 25 ára búsetu í Bandaríkjunum.

„Ólíkt fyrstu myndinni þá ætla ég ekki að framkvæma þessa mynd fyrr en ég fæ framleiðslustyrk. Ég er búin að gera mynd með engum styrkjum. Það var frábær reynsla og ég lærði ofboðslega mikið af því en ég ætla að gera þetta í réttri röð ef ég ætla að gera þetta aftur,“ segir Ragnhildur.

Vegferð From Oakland to Iceland er ekki lokið. Myndin hefur verið sýnd á MTV-vef Skandinavíu, í Kanada og á Íslandi og nú er plakatið sem var gert fyrir myndina ofarlega á lista í nýrri íslenskri könnun yfir bestu bíómyndaplaköt áratugarins. „Þetta kom mér mjög mikið á óvart því það vita flestir að þessi mynd var gerð fyrir mjög lítinn pening og fjármagnið fyrir plakatið var líka lítið,“ segir Ragnhildur, sem átti hugmyndina að plakatinu. Þórdís Claessen annaðist síðan grafíska hönnun þess.

Ragnhildur hætti sem útvarpskona á Bylgjunni í október eftir nokkurra ára starf. „Ég fór í stutt endurhæfingarfrí vegna bílslysameiðsla en sagði upp verktakasamningi mínum við Bylgjuna í kjölfarið. Ég fann að mig langaði ekki aftur í akkúrat þetta starf þegar ég fer aftur að vinna. Það var bara kominn tími á breytingar.“ - fb