Hyggjast leiðrétta mistök viðskiptaráðherra

Fátt bendir til þess að fyrrum starfsmenn Sparisjóðabankans og Straums Burðaráss fái greidd út laun um næstu mánaðamót þrátt fyrir yfirlýsingar ríkisstjórnarinnar um hið gagnstæða. Þingmaður Framsóknarflokks undrast seinagang stjórnvalda í málinu.

Starfsmönnum Sparisjóðabankans og Straums Burðarás var sagt upp störfum þegar ríkið tók bankana yfir í vetur. Ákvæði í lögum um slitastjórnir bankanna gera það hins vegar að verkum að ekki er leyfilegt að greiða út laun fyrr en fyrsti kröfuhafafundur hefur farið fram. Gera má ráð fyrir að þeir fundir verði ekki haldnir fyrr en eftir þrjá til fjóra mánuði.

Stjórnvöld hafa lýst því yfir að þau ætli að tryggja að laun verði greidd út næstu mánaðmót. Til þess þarf hins vegar að breyta lögum um slitastjórni bankanna og frumvarp þessa efnis hefur enn ekki verið lagt fram.

Eygló Harðardóttir, þingmaður Framsóknarflokks, segir augljóst að ríkisstjórnin hafi gert mistök í lagasetningu og undrast að ekki sé búið að leggja fram frumvarp til að leiðrétta þessi mistök.

Eygló segir mjög einfalt að breyta þessu. „Það þarf að bæta við einni málsgrein við 102. grein laganna og við framsóknarmenn hyggjumst leggja fram frumvarp til að leiðrétta þessi mistök sem viðskiptaráðherra gerði."

Frumvarpið verður lagt fram á mánudag en Eygló óttast að ekki verði hægt að afgreiða frumvarpið sem lög fyrir mánaðamót.