Alonso: Benitez rétti maðurinn til að stýra Liverpool

Miðjumaðurinn Xabi Alonso hjá Real Madrid viðurkennir að sárt hafi verið fylgjast með slöku gengi fyrrum liðsfélaga hans hjá Liverpool upp á síðkastið en ítrekar þó í viðtali við The Times að knattspyrnustjórinn Rafa Benitez sé rétti maðurinn til þess að leiða liðið aftur á beinu brautina.

„Það er ekki stíll Liverpool að reka knattspyrnustjóra sinn snemma tímabils þrátt fyrir nokkur slæm úrslit í röð. Ég er líka sannfærður um að Rafa sé rétti maðurinn til þess að stýra Liverpool.

Hann er frábær knattspyrnustjóri og ég ber mikla virðingu fyrir honum og er honum þakklátur fyrir frábær fimm ár hjá Liverpool undir hans stjórn," segir Alonso.