Væri skárra að þjóðnýta strax

„Það væri betra hjá þeim að þjóðnýta fyrirtækin strax í stað þess að fara þessa leið og eyðileggja þau þannig,“ segir Friðrik J. Arngrímsson, framkvæmdastjóri LÍÚ. Hann er afar ósáttur við það að ríkisstjórnin skuli ætla að innkalla veiðiheimildir á 20 árum og segir útgerðarfyrirtækin ekki þola það.

„Það er miðað við að þetta taki gildi 1. september 2010 og það er okkar verkefni núna að sannfæra fólkið um hversu skaðvænlegt þetta er.“ Hann segir enn fremur að markmiðin sem sett eru upp í stjórnarsáttmálanum gangi hvort gegn öðru. „Það segir að skapa eigi greininni bestu rekstrarskilyrði sem völ er á og treysta rekstrargrundvöllinn til langs tíma. En á sama tíma er verið að grafa undan rekstrargrundvellinum og langtíma hugsun.“

Steingrímur J. Sigfússon, formaður Vinstri grænna, sagði á blaðamannafundinum í gær að þessi aðgerð væri vissulega ekki hafin yfir gangrýni en engum dytti í hug að fara í þær ef þær yrðu til þess að sjávarútvegur færi á hausinn og tæki bankana með sér í fallinu eins og útreikningar útgerðarmanna hafa sýnt fram á.

„En það er ekki svo að innkallaðar veiðiheimildir hverfi til himna, þeim verður úthlutað aftur þannig að það er margt við þessar hugmyndir að athuga.“- jse