Yfir 10 þúsund staðfest tilfelli af inflúensu A

Samkvæmt upplýsingum Sóttvarnarstofnunar ESB voru staðfest tilfelli inflúensu A (H1N1) alls 10.215 í morgun í 42 ríkjum í heiminum. Í tilkynningu frá Sóttvarnalækni og Almannavörnum segir að langflest flensutilfellanna séu í Bandaríkjunum eða 5.469 en í þeirri tölu eru einnig líkleg flensutilfelli þar í landi.

„Staðfest dauðsföll vegna inflúensunnar eru nú 80 talsins, langflest í Mexíkó eða 72. Sex dauðsföll eru staðfest í Bandaríkjunum, eitt í Kanada og eitt í Kosta Ríka," segir ennfremur. Haldinn verður sameiginlegur fundur sóttvarnalækna og lögreglustjóra landsins mánudaginn 25. maí undir yfirstjórn sóttvarnalæknis og almannavarnadeildar ríkislögreglustjóra. Á fundinum verður farið yfir innlendar viðbragsáætlanir og horft til framtíðar.

• Sýkingar af völdum inflúensunnar eru vægar enn sem komið er í flestum löndum.
• Engin tilfelli hafa greinst hér á landi.
• Viðbragsáætlanir eru óbreyttar hér landi.
• Læknar og aðrir heilbrigðisstarfsmenn eru áfram hvattir til að senda sýni í greiningu á veirufræðideild Landspítalans frá sjúklingum með inflúensulík einkenni.