Nasistaglingur til sölu á íslenskri bloggsíðu

Nafnlaus Íslendingur, sem kallar sig Himmler, í höfuðið á Heinrich Himmler, yfirmanni Gestapó og SS sveitanna, er með tvo verðmæta nasistahringi til sölu á bloggsíðu á vefsvæði Vísis. Þá er einnig hægt að kaupa bókina Mein Kampf.

Á vefsíðunni er hringunum tveimur lýst svona:

„Annar er foringjahringur áritaður með nafni. Dagsetning og áritum Himmlers. Þessa hringa gaf Himmler öllum sínum foringjum og bar hver og einn sinn hring til merkis um traust sitt og hollustu til Himmlers og SS sveitanna. Það sést vel að hringurinn er gamall og merki SS sveitanna sjást vel, auk annarra merkja á hringnum sem er hluti af úthugsun Himmlers með SS sveitirnar."

Þá segir ennfremur að báðir hringarnir séu frá árinu 1936. Þeir eru því 70 ára gamlir stríðsmunir sem eru einstakir að mati eigandans. Hann segir þá eigulega fyrir safnara sem hafa áhuga á þessum tíma heimssögunnar. Allir þessir munir eru taldir mjög verðmætir, segir einnig á vefsíðunni.

Fram kemur að hlutirnir séu ekki seldir undir hundrað þúsund krónum.

Sá sem selur hlutina gefur ekki upp eigið nafn, heldur má nálgast hann á póstfanginu himmler@visir.is. Hann tekur skýrt fram á vefsíðunni að hann sé alls ekki að grínast og að öllum skilaboðum verði svarað. Síðuhaldarinn vill einnig meina að munirnir séu persónulegar gjafir frá foringjum úr her Hitlers.

Vísir freistaðist til þess að ná sambandi við eiganda munanna í gegnum tölvupóstinn en hefur ekki enn fengið svar.

Hafi hinsvegar einhver áhuga á að skoða munina þá má sjá þá hér.