Verðskuldaður sigur Liverpool á United - Tvö rauð spjöld

Liverpool-liðið stimplaði sig aftur inn í enska boltann í dag er liðið lagði meistara Man. Utd að velli í stórleik dagsins í enska boltanum.

Fernando Torres skoraði fyrra markið á 65. mínútu og David Ngog bætti öðru marki við í uppbótartíma þegar allt lið Man. Utd var komið fram á völlinn.

Sigurinn verðskuldaður hjá Liverpool sem spilaði virkilega vel í dag. Leikmenn liðsins geysilega grimmir, liðið vel skipulagt og uppskar eins og það sáði. Þetta var þriðji sigur Liverpool á United í röð.

Torres snéri aftur í liðið og gerði geysilega vel er hann skoraði fyrra mark leiksins. Hann fékk stungusendingu frá Benayoun, hélt Rio Ferdinand vel frá sér og kláraði færið af snilld.

Antonio Valencia komst næst því að jafna leikinn fyrir United á 84. mínútu er skot hans fór í slána.

Nemanja Vidic fékk rautt í þriðja leiknum í röð gegn Liverpool á 89. mínútu. Hann fékk þá sitt annað gula spjald og þar með það rauða.

Mascherano fór sömu leið í uppbótartíma en hann fékk einnig tvö gul spjöld.

United færði allt sitt lið upp undir lokin og var refsað er Ngog fullkomnaði daginn fyrir Liverpool sem er mætt aftur.

Michael Owen spilaði síðustu 25 mínútur leiksins, lét aðeins til sín taka en náði ekki að skora.