Þurfum að passa okkur betur

VG sendi lista til stærstu fyrirtækja landsins í aðdraganda alþingiskosninganna 2007, þar sem falast var eftir styrkjum.

Íslandspóstur, opinbert fyrirtæki, var á þeim lista, en samkvæmt lögum um stjórnmálasamtök er ólöglegt að taka við styrkjum frá opinberum fyrirtækjum.

Framkvæmdastýra VG, Drífa Snædal, vill ekki tjá sig um hvort flokksmenn hafi ekki vitað að Íslandspóstur var opinbert fyrirtæki, ekki þekkt lögin eða að önnur ástæða hafi legið að baki. Hún segir að fáir hafi að líkindum séð nafn fyrirtækisins á blaðinu.

„Þetta ber ekki fyrir augu margra, þegar farið er að skoða reikninga, gera uppgjör og allt það," segir hún: „Við áttuðum okkur ekki á þessu fyrr en þetta var komið í fjölmiðla og þá var þetta endurgreitt samdægurs."

Drífa segir að unnið sé að því að svona nokkuð geti ekki endurtekið sig innan flokksins: „Við þurfum að vera betur á varðbergi."

Efnahagsbrotadeild Ríkislögreglustjóra skoðar nú styrki til fjögurra stærstu flokkanna frá Íslandspósti.

Rætt var við framkvæmdastjóra Framsóknar og Samfylkingar í blaðinu í gær. Enn hefur ekki náðst í Andra Óttarsson, þáverandi framkvæmdastjóra Sjálfstæðisflokksins. Sá flokkur tók við styrkjum frá þremur opinberum fyrirtækjum fyrir kosningarnar.- kóþ