Ráðherra ýtir á skilanefnd

Skilanefnd Kaupþings leyfir viðskiptanefnd ekki að sjá „þýska bréfið", þar sem meintar hótanir þýskra yfirvalda í garð íslenskra koma fram. Viðskiptaráðherra sagði á Alþingi í gær að ráðuneyti sitt hefði rekið á eftir skilanefndinni um að skýra sín sjónarmið um þetta, og að skeytið verði birt.

„Það verður enginn fegnari en ég þegar þetta skeyti kemur fyrir almenningssjónir," sagði Gylfi Magnússon ráðherra.

Hann tók fram að rétt væri að Þjóðverjar hefðu áhyggjur af greiðslum vegna Kaupþing Edge-reikninganna. „Þjóðverjar hafa ekki með neinum hætti haft í hótunum […] í þessu máli," sagði Gylfi. Verið væri að gera vinaþjóð upp miklar sakir með dylgjum.

Ragnheiður Elín Árnadóttir þingmaður hafði vakið athygli á málinu og vænt ráðherrann, sem hefði kallað eftir opnu og gegnsæju viðskiptalífi á sínum tíma, um að fela sig á bak við skilanefndina.

Álfheiður Ingadóttir, formaður viðskiptanefndar, segir óviðeigandi að einhver leynibréf séu á ferð um samfélagið sem Alþingi megi ekki sjá. Greint var frá bréfinu í fréttum Stöðvar 2 á föstudag. - kóþ