Gömul refabú fjúka yfir Grundarhverfi

Skæðardrífa af þakjárni gekk yfir Brautarholt á Kjalarnesi, Grundarhverfi, fyrir skömmu og kom hún frá gömlu refahúsunum í Hjassa sem er utarlega á Kjalarnesi. Björgunarsveitamenn reyna nú að hemja fokið. Auk þeirra eru tvær dráttarvélar á leið á staðinn til aðstoðar.

Þetta kemur fram í fréttatilkynningu frá Landsbjörgu. Þar segir ennfremur að björgunarsveitarfólk á höfuðborgarsvæðinu hafi sinnt yfir 60 útköllum af ýmsu tagi í dag. Björgunarfélag Vestmannaeyja hefur einnig staðið í ströngu en þar hafa beiðnir um aðstoð verið um 30 talsins en veður hefur skánað talsvert þar undanfarna klukkustund.

Björgunarsveitin Tintron í Grímsnesi var kölluð út rétt fyrir klukkan fjögur í dag þegar þak var farið að losna af húsi í Sólheimum og einnig var Þorbjörn í Grindavík kölluð út þegar þakklæðning losnaði af íbúðarhúsi í bænum.