Stjórnlagaþing getur aðeins verið ráðgefandi

Stjórnlagaþing mun verða ráðgefandi samkvæmt nýjum samstarfssáttmála ríkisstjórnarflokkanna. Alþingi mun því þurfa að samþykkja tillögur þess til þess að breytingar geti orðið á stjórnarskrá. Þetta er ekki í samræmi við hugmyndir um stjórnlagaþing sem ræddar voru fyrir kosningar.

Dagur B Eggertsson, varaformaður Samfylkingarinnar, segir að þessi breyting hafi orðið vegna þess að ekki hafi tekist að breyta stjórnarskránni fyrir kosningar. Sjálf breytingin á stjórnarskrá þurfi að fara í gegnum Alþingi vegna stjórnarskrárbundinna formregla. „Þannig að það var annaðhvort að gera þetta svona eða fresta málinu og það vildi fólk ekki, eðlilega," segir Dagur.

Dagur segir að sjálfstæðismenn hafi lagt sérstakan metnað í að koma í veg fyrir að almenningur gæti komið að umræðu og breytingum á stjórnarskrá með málþófi. „Þannig að þetta er til þess að hrinda þessu í framkvæmd en Alþingi þarf að afgreiða breytingar á stjórnarskrá af því að það náðist ekki að breyta stjórnarskránni sjálfri," segir Dagur.