Vilja 50 þúsund kall fyrir öryggismyndavélina

Tuttugu og þriggja ára gamall Reykvíkingur hefur verið ákærður fyrir að hafa slegið öryggismyndavél Alþingis er hékk á norðvesturenda hússins, utan í steinvegg, með þeim afleiðingum að myndavélin eyðilagðist. Þá gerir Helgi Bernódusson skrifstofustjóri Alþingis fyrir hönd Alþingis kröfu um að maðurinn verður dæmdur til greiðslu skaðabóta að fjárhæð 49.396 króna.

Öryggismyndavélin var brotin í mótmælum við Alþingishúsið þann 13.janúar síðastliðinn. Þau mótmæli voru fámenn í samanburði við þau sem síðar áttu eftir að vera. Um þrjátíu manns meinuðu Geir H. Haarde þáverandi forsætisráðherra og Þorgerði Katrínu Gunnarsdóttur þáverandi menntamálaráðherra inngögnu inn í húsið.

Maðurinn var síðan handtekinn ásamt öðrum vegna brotsins en var sleppt síðar sama dag. Lögreglustjórinn á höfuðborgarsvæðinu höfðar málið og krefst þess að maðurinn verði dæmdur til refsingar og greiðslu alls sakarkostnaðar.