Wigan lagði Chelsea - Keane með fjögur

Wigan gerði sér lítið fyrir og vann 3-1 sigur á Chelsea sem var ósigrað og á toppi ensku úrvalsdeildarinnar fyrir leiki dagsins.

Titus Bramble kom Wigan yfir með skalla snemma leiks en Didier Drogba jafnaði metin í upphafi síðari hálfleiks.

Vendipunktur leiksins kom stuttu síðar þegar að Petr Cech, markvörður Chelsea, var rekinn af velli fyrir brot inn í teig. Vítaspyrna var dæmd og skoraði Hugo Rodallega úr henni.

Paul Scharner innsiglagði svo sigur Wigan í uppbótartíma.

Fernando Torres skoraði þrennu er Liverpool vann 6-1 stórsigur á Hull og ljóst að staða Phil Brown, stjóra síðarnefnda liðsins, styrktist ekki eftir leikinn í dag.

Torres kom Liverpool í 3-0 strax í upphafi síðari hálfleiks en Steven Gerrard bætti því fjórða við. Ryan Babel kom svo inn á sem varamaður og skoraði síðustu tvö mörkin. Geovanni skoraði mark Hull á 15. mínútu.

Robbie Keane fór á kostum með Tottenham sem fór einnig illa með Burnley og vann, 5-0. Keane skoraði fjögur marka Tottenham og Jermaine Jenas eitt. Jóhannes Karl Guðjónsson lék allan leikinn fyrir Burnley.

Manchester United vann svo 2-0 sigur á Stoke á útivelli en Dimitar Berbatov og John O'Shea skoruðu mörk United í síðari hálfleik.

Bolton vann 2-1 sigur á Birmingham á útivelli. Tamir Cohen og Chung-Yong Lee skoruðu mörk Bolton en Kevin Phillips fyrir Birmingham. Grétar Rafn Steinsson kom ekki við sögu í leiknum.

Blackburn vann einnig 2-1 sigur á Aston Villa. Gabriel Agbonlahor kom Aston Villa yfir strax í upphafi leiks en þeir Christopher Samba og David Dunn tryggðu Blackburn sigur í leiknum.

Manchester United og Chelsea eru jöfn á toppi deildarinnar með átján stig en United er með betra markahlutfall. Liverpool og Tottenham koma næst með fimmtán stig.