Bjarni: Kostnaður við skilanefndirnar óeðlilega hár

Bjarni Benediktsson, formaður Sjálfstæðisflokksins, segir að kostnaður við skilanefndir gömlu bankanna sé óeðlilega hár. Hann vill að gert verði nánar grein fyrir kostnaðinum.

Skilanefndir gömlu bankanna innheimtu ríflega 260 milljónir króna fyrir vinnu sína frá október og fram í febrúar. Kostnaðurinn er greiddur úr ríkissjóði. Þetta kom fram í tölum sem Fjármálaeftirlitið tók saman fyrir fréttastofu Ríkisútvarpsins og voru birtar í kvöld.

„Það þarf til dæmis að útskýra af hverju menn voru ekki ráðnir sérstaklega til þessara starfa í stað þess að þeir væru að starfa allan tímann í þessum verkefnum í fullu starfi á sérfræðitaxta," segir formaðurinn.

Bjarni segir að þetta sé sérstaklega mikilvægt því um sé að ræða kostnað sem fellur ekki á þrotabú bankanna heldur ríkissjóð.