Vill fjölga 30 kílómetra svæðum

„Ég er á þeirri skoðun að margir pólitíkusar ættu að tala minna um tugmilljónaframkvæmdir í jarðgangagerð og tónlistar- og ráðstefnuhúsi á meðan þeir spara eyrinn í einföldum öryggisaðgerðum. Öryggi á alltaf að hafa forgang yfir gæluverkefni stjórnmálamanna,“ segir Ólafur F. Magnússon, borgarfulltrúi F-listans og óháðra.

Ólafur hyggst leggja fram þá tillögu á fundi borgarráðs á fimmtudag að hluta Hringbrautar og Háaleitisbrautar verði breytt og þar aðeins leyfður þrjátíu kílómetra hámarkshraði.

Í tillögu Ólafs er jafnframt hvatt til þess að á allri Hofsvallagötunni verði þrjátíu kílómetra hámarkshraði.

Þá hvetur Ólafur til þess að unnar verði nýjar og víðtækari tillögur umhverfis- og samgönguráðs um fleiri götur með þrjátíu kílómetra hámarkshraða og einnig mislæg göngutengsl í öllum hverfum borgarinnar. Fleiri hugmyndir í svipuðum dúr fylgja tillögum Ólafs.

Ólafur segir að banaslysið á Hringbraut síðastliðinn föstudag hljóti að verða vendipunktur í hugarfari fólks um umferðarmál. „Það hafði verið varað við þessu í langan tíma. Tillögur mínar eru róttækar og munu eflaust mæta andstöðu, en nauðsyn brýtur lög. Það segi ég sem heilbrigðisstarfsmaður og foreldri,“ segir Ólafur F. Magnússon.

- kg