Gylfi gefur lítið fyrir óskhyggju og bókhaldsbrellur

Gylfi Magnússon viðskiptaráðherra kannast ekki við að það sé hans hjartans mál að ekki megi afskrifa eina einustu krónu af skuldum Íslendinga.

Þetta skrifar hann í opnu svarbréfi til Jóns Baldvins Hannibalssonar fyrrverandi ráðherra á fréttavefnum pressan.is.

Hann segist hafa stutt heils hugar lög um skuldaaðlögun, sem feli í sér niðurfellingu skulda og sömuleiðis hafi hann stutt sérstök úrræði Íbúðalánasjóðs sem létti greiðslubyrði lántakenda. Viðskiptaráðherra kveðst líka meira en til í að skoða tillögur um önnur slík úrræði og muni fagna því manna mest ef hægt verði að gera meira fyrir alla þá sem hafa orðið illa fyrir barðinu á efnahagsþrengingum undanfarinna mánuða.

Hann biður Jón Baldvin hins vegar að fyrirgefa að hann gefi lítið fyrir óraunhæf úrræði sem byggi á óskhyggju eða bókhaldsbrellum. Þau gagnist engum.