Síðasti söludagur bleiku slaufunnar á morgun

Nú eru síðustu forvöð að fjárfesta í bleiku slaufunni og styrkja þar með Krabbameinsfélag Íslands í baráttunni gegn brjóstakrabbameini eins og segir í tilkynningu frá Krabbameinsfélagi Íslands.

Þar segir ennfremur að þrátt fyrir að árveknisátak um brjóstakrabbamein standi út októbermánuð rennur söluátakið út á morgun, fimmtudag. Salan hefur gengið vel, en þó má enn kaupa slaufur víða um land.

„Við erum komin langleiðina með að nálgast takmark okkar að selja 45.000 slaufur, en vantar þó herslumuninn! Við vonumst til að ná því í dag og á morgun, og hvetjum því karla og konur um allt land að kaupa sér slaufu og styrkja þannig leitarstarf Krabbameinsfélags Íslands," segir Guðrún Agnarsdóttir, forstjóri Krabbameinsfélags Íslands.

Það er skartgripahönnuðurinn Sif Jakobs sem hannaði slaufuna. Sif rekur eigin skartgripalínu í Danmörku og selur hönnun sína víða um heim. Þá hefur hún unnið fyrir heimsþekkta hönnuði og er aðalhönnuður eins stærsta skargripafyrirtækis Kína.

Regluleg leit að krabbameini er ein besta forvörn sem til er og er stór þáttur í þeim góða árangri sem Íslendingar hafa notið í baráttunni við brjósta- og leghálskrabbamein. Leitarstarf Krabbameinsfélags teygir arma sína hringinn í kringum landið. Skipuleg leit að krabbameini í leghálsi og brjóstum er á mánudögum, þriðjudögum og miðvikudögum í Reykjavík, að jafnaði tvo daga í mánuði á Akureyri en á flestum öðrum stöðum á landinu er skoðað einu sinni á ári eða annað hvert ár.