Endurútgefur Páls Óskars-plötu

„Mér fannst yndislegt að vinna þetta upp á nýtt,“ segir kontratenórinn Sverrir Guðjónsson. Hann, í samvinnu við Skálholtsútgáfu, hefur endurútgefið plötuna „Og það varst þú“ sem hann tók upp með Páli Óskari Hjálmtýssyni fyrir 25 árum.

Nýja útgáfan er endurhljóðblönduð og hefur Sverrir einnig bætt við þremur barnasöngvurum úr Söngvaseiði sem syngja ofan í kórinn sem var á upphaflegu plötunni. „Ég fann Pál Óskar á þeim tíma þegar hann var að syngja í leikriti. Ég heillaðist af röddinni hans og ákvað að athuga hvort hann væri ekki til í að syngja inn á plötu með mér sem þá var í undirbúningi. Hann tók því mjög vel,“ segir Sverrir um samstarfið við Pál Óskar.

„Hann var með mjög heillandi drengjarödd og ég var mjög fljótur að kveikja á því.“ Á meðal laga á plötunni eru Í bljúgri bæn, Er vasapening ég fæ og Hringrás, sem er eftir Joni Mitchell.

Eftir að platan kom út týndust upptökurnar en þegar þær komu aftur í leitirnar fyrir nokkru ákvað Sverrir að endurútgefa þær á geisladiski. Á plötunni eru einnig gamlar upptökur frá sex ára krökkum sem Sverrir hafði kynnst í opna skólanum í Fossvogi þar sem hann starfaði. Fékk hann krakkana til að tala um lífið og tilveruna við píanóundirleik Jónasar Þóris.

„Það sem kom mér á óvart við að fara ofan í saumana á þessu löngu síðar er hversu einlæg platan er og hversu vel hún talar til okkar á þessum tímum. Ísland sem þjóð hefur misst sjálfstraustið og ég finn að fólk leitar í þessi gömlu gildi sem við lærðum sem börn,“ segir Sverrir.

- fb