Umdeild fegurðardrottning eyðir jólunum á Íslandi

„Ég vil synda í Bláa lóninu um jólin. Ég verð vonandi búin að bóka farið í næstu viku," sagði Rachel Kum, ungfrú Singapore, á vefsíðu sinni í vikunni.

Rechel kemur til landsins í desember og verður samkvæmt heimildum Fréttablaðsins í fylgd með vini sínum.

Hún er umdeild í heimalandi sínu eftir að myndir af henni úr gleðskap fóru í dreifingu á Netinu. Myndirnar eru reyndar sárasaklausar, sýna hana meðal annars faðma stúlku í typpabúningi og bíta í köku sem er einnig í laginu eins og typpi. Myndirnar fóru fyrir brjóstið á fólki sem fannst hegðun hennar óviðeigandi vegna titilsins. Þeim var lekið á Netið tveimur mánuðum áður en hún tók þátt í Miss Universe, en stjórnendur fegurðarsamkeppninnar í Singapore blésu á gagnrýnisraddirnar. Þeir sögðu að myndirnar skiptu engu máli - þær væru bara teknar í veislum sem fólk hefur haldið fyrir hana.

Ingibjörg Ragnheiður Egilsdóttir keppti í Miss Universe á árinu ásamt Rachel. Hún vissi af komu hennar til landsins og þær hafa verið í tölvupóstsambandi frá því að keppni lauk. Ingibjörg lýsir Rachel sem miklum töffara og segir að hún sé mjög skemmtileg stelpa. „Hún er ekki svona týpísk pempíudrottning," segir Ingibjörg og bætir við að áhugi hennar á Íslandi hafi ekki verið áberandi, þó að hún hafi forvitnast um landið eins og hinir keppendurnir. „Hún spurði hvernig Íslandi væri og hvernig væri að búa þar."

Rachel hefur útbúið lista yfir það sem hún vill sjá á Íslandi á meðan á dvöl hennar stendur. Hún vill augljóslega fara hinn hefðbundna túrístarúnt, ætlar í Bláa lónið og langar að sjá norðurljósin, sem Ingibjörg segir að hafi heillað stelpurnar í keppninni. „Þeim fannst norðurljósin alveg mögnuð, en við lítum náttúrulega öðruvísi á þau vegna þess að við erum búin að sjá þau svo oft." Ekki náðist í Rachel sjálfa, en aðstoðarmaður hennar tjáði Fréttablaðinu að hún væri að sýna á góðgerðartískusýningu í Sri Lanka.

atlifannar@frettabladid.is