Segir Rúv hafa sýnt sér vanvirðingu og ruddalega framkomu

Ólafur F. Magnússon borgarfulltrúi og fyrrverandi borgarstjóri ætlar í meiðyrðarmál við Rúv vegna ummæla sem látin voru falla í hádegisfréttum útvarpsins á mánudagsmorgun. Þar var því haldið fram að Ólafur hefði látið leggja fé inn á sinn eigin reikning en ekki til Frjálslyndaflokksins. Ólafur segir að með þeim ummælum hefði Rúv verið að þjófkenna sig.

„Ég er síðasti stjórnmálamaðurinn á Íslandi sem myndi draga að sér fé, fáir hafa sýnt meiri ráðdeildarsemi með fjármuni almennings og ég," segir Ólafur sem er orðinn þreyttur á framkomu Rúv í sinn garð.

„Frá því að ég var borgarstjóri hefur Ríkisútvarpið alltaf reynt að gera verk mín tortryggileg. Þeir hafa bæði sýnt mér vanvirðingu og ruddalega framkomu. Þá er ég að tala um fréttastofuna og forsvarsmenn Kastljóss og Silfur Egils, mælirinn er einfaldlega fullur núna."

Ólafur telur að Rúv þurfi meira aðhald. „Ekki síst af hálfu þeirra sem borga fyrir þetta spillingarbæli sem Rúv er."

Ólafur segist ætla að leggja fram fyrirspurn um þetta mál í borgarráði á eftir en hann telur afar óeðlilegt að borgarstjóri hafi svarað bréfi frá Frjálslyndaflokknum sem var uppfullt af rangfærslum.

„Þetta er algjörlega mál mitt og skrifstofu borgarstjórnar."

Málið snýst um ásakanir Guðjóns Arnars Kristjánssonar formanns Frjálslyndaflokksins sem hefur haldið því fram að Ólafur hafi látið greiða lögbundinn styrk borgarinnar til stjórnmálaflokka inn á reikning með sinni kennitölu í upphafi árs 2008 en ekki til flokksins líkt og tíðkast hefur. Þetta segir Ólafur ekki rétt.

Hann segir féð hafa farið inn á á reikning borgarmálafélags F-listans sem hann og fleiri félagar í flokknum hafi stofnað. Það félag sé með sér kennitölu og hann sé ekki einn í því félagi. Þannig sé þetta einnig hjá Vinstri grænum í borginni.

„Þorleifur Gunnlaugsson oddviti VG hefur lýst yfir mikilli skömm við mig um þá aðför sem hefur verið gerð að mér."

Ólafur segir að viðbrögð sín við frétt Rúv séu að þeir fái að gjalda fyrir þessa framkomu í sinn garð. „Sem hefur verið óheiðarleg um langan tíma."