Eva Joly: Einkamál gegn auðmönnum pólitísk friðþæging

Ríkisstjórnin ákvað í vikunni að stofna starfshóp með fulltrúum fjögurra ráðuneyta til að kanna möguleika ríkisins á að reka skaðabótamál á hendur einstaklingum sem kunna að hafa valdið almenningi fjárhagstjóni með athöfnum sínum eða athafnaleysi í aðdraganda bankahrunsins.

Meðal annars stjórnarmönnum í Landsbankanum og ráðamönnum. Eva Joly furðar sig á að fjármálaráðherra velji þessa leið í stað þess að nýta þær stofnanir sem fyrir eru.

Eva Joly vísar meðal annars til embættis ríkislögmanns og Landsdóms sem fer með mál sem alþingi ákveður að höfða gegn ráðherrum út af embættisrekstri þeirra. Hann var stofnaður árið 1905 - en hefur aldrei verið kallaður saman. Joly telur eðlilegra að styrkja embætti ríkislögmanns sem hafi leiðir, mannafla og þekkingu til að gæta hagsmuna ríkisins.

Væntingar fólk séu vissulega miklar, segir Joly, og því freistandi fyrir stjórnmálamenn að seðja almenning með þessum hætti.

Hún er hins vegar afar sátt við að skilyrðin sem hún setti fyrir áframhaldandi ráðgjöf sinni hafi verið mætt og fagnar því hversu hratt hafi gengið að setja lög um stöður þriggja sjálfstæðra saksóknara sem ellefu manns hafa nú sótt um. Sömuleiðis segir hún ásættanlega lausn að settur verður sérstakur ríkissaksóknari fyrir bankahrunið, fyrst Valtýr Sigurðsson hafi ekki viljað láta af embætti.