Wenger vorkennir Liverpool

Arsene Wenger, stjóri Arsenal, segist bera mikla samkennd með Liverpool vegna ófara síðarnefnda liðsins í haust.

Liverpool mætir ungverska liðinu Debrecen á útivelli í Meistaradeildinni í kvöld og verður að sigra og stóla á hagstæð úrslit í leik Fiorentina og Lyon til að eiga möguleika á að komast áfram í 16-liða úrslit keppninnar.

„Liverpool er félag sem á sér afar ríka sögu og stuðningsmenn þess hafa í mínum huga ávallt verið öðrum til fyrirmyndar," sagði Wenger. „En félagið hefur verið svolítið óheppið undanfarnar sex vikur. Liðið hefur ekki fengið það sem það átti skilið úr sínum leikjum."