Svandís hefur engar skýringar fengið frá Jóhönnu

Svandís Svavarsdóttir umhverfisráðherra hefur ekki fengið skýringar frá forsætisráðherra á ummælum hennar um stóriðjumálin á flokksstjórnarfundi Samfylkingarinnar um helgina. Umhverfisráðherra á erfitt með að tjá sig um málið þar sem hún gæti átt eftir að úrskurða í því.

Jóhanna Sigurðardóttir forsætisráðherra sagði á flokksstjórnarfundi Samfylkingarinnar um helgina að hún væri sannfærð um að hægt væri að hefja framkvæmdir við álver í Helguvík í vor og að hindrunum yrði ýtt úr vegi vegna lagningar suðvesturlínu í tengslum við álverið. Svandís Svavarsdóttir umhverfisráðherra sagði við fréttamann okkar um helgina að Jóhanna yrði að skýra þessi ummæli sín nánar.

Að loknum ríkisstjórnarfundi skömmu fyrir hádegi sagði Svandís að þetta mál hefði ekki verið þar til umræðu og að forsætisráðherra hefði ekki skýrt þetta sérstaklega fyrir sér.

„Það hefur ekki verið á dagskrá í okkar samskiptum. Við sátum hér á ríkisstjórnarfundi og þar voru önnur mál undir," sagði Svandís.

Svandís sagði að málefni Suðvesturlínu vera í ákveðnu ferli. „Við sjáum bara hvernig því vindur fram. Skipulagsstofnun er búin að úrskurða hvað það mál varðar og kærufrestur stendur yfir."

Þá sagðist Svandís eiga erfitt með að tjá sig um málið þar sem hún gæti átt eftir að úrskurða í því.