Wenger missti stjórn á skapinu vegna spurningar um HM

Arsene Wenger, stjóri Arsenal, missti algjörlega stjórn á skapi sínu þegar hann var spurður um möguleika Theo Walcott að komast á HM í Suður-Afríku í sumar.

Arsenal tapaði óvænt fyrir Sunderland í ensku úrvalsdeildinni um helgina en margir leikmenn voru fjarverandi vegna meiðsla. Þeirra á meðal Robin van Persie sem meiddist í vináttulandsleik með Hollandi fyrr í mánuðinum.

Theo Walcott, leikmaður Arsenal, hefur átt við þrálát meiðsli að stríða en kom inn á sem varamaður í leiknum um helgina. Það var hans þriðji leikur síðan að tímabilið hófst í Englandi.

Wenger var spurður hvort að Walcott þyrfti að ná sér algjörlega góðum af meiðslum sínum til að eiga möguleika á að komast á HM með enska landsliðinu. Þá missti Wenger stjórn á skapinu sem gerist víst ekki oft.

„Fjandinn hafi það - HM er í júní. Er hann nokkuð í fríi til 9. júní? Þú hlýtur að vera að grínast," sagði Wenger.

„Hann er á launum hjá Arsenal fyrir að spila í hverri viku. Og hann fær vel borgað. Af hverju ætti ég að hafa áhyggjur af því hvað gerist á HM? Af hverju í ósköpunum ætti mér ekki að standa á sama? Hann veit ekki einu sinni hvort hann verður með á HM."

„Þetta snýst um að hann standi sig vel með Arsenal. Það er Arsenal sem borgar launin hans - ekki heimsmeistarakeppnin. Hann verður meira að segja á launum hjá Arsenal á meðan heimsmeistarakeppninni stendur."

Arsenal mætir Standard Liege í Meistaradeild Evrópu í kvöld og getur tryggt sér sæti í 16-liða úrslitum keppninnar með jafntefli.