Eins og traktor á þjóðvegi

Fyrsta plata Feldberg, Don‘t Be a Stranger, er komin út. Feldberg er samstarfsverkefni söngkonunnar Rósu Birgittu Ísfeld, sem syngur að auki með hljómsveitinni Sometime, og Einars Tönsberg, sem hefur gert það gott sem einyrkinn Eberg. Allt byrjaði þetta með grípandi popplagi í auglýsingu.

„Það var vegna Kringluauglýsingar (lagið „Running Around“) sem við hittumst fyrst. Upp úr því fórum við að hittast reglulega til að sjá svona hvað kæmi út úr því,“ segir Einar.

„Það var svo sem ekkert markmið í fyrstu en fljótlega varð ljóst að það yrði plata úr þessu,“ segir Rósa.

Vinnuhraðinn er mikill þegar verið er að búa til lög í auglýsingar – „Það þarf alltaf helst að klára á morgun,“ segir Einar – en bandið gat leyft sér yfirlegu við plötugerðina: „Lögin fengu að malla. Að gera þessa plötu var dálítið eins og að keyra traktor eftir þjóðvegi.“

„Við vissum ekki alveg hvert þetta stefndi fyrr en tvö síðustu lögin urðu til. Þau eru lög númer eitt og tvö á plötunni. Þá límdist platan loksins saman og við urðum fullkomlega sátt,“ segir Rósa.

Einar segir það miklu erfiðara að búa til popptónlist en svokallaða „erfiða tónlist“ – „Miklu erfiðara! Maður er berari. Allir geta gagnrýnt popptónlist réttilega því það skilja allir popp. Ef þú ert úti í einhverju horni með þína músík geturðu bara sagt að fólk skilji ekki tónlistina þína ef það fílar hana ekki. Annars ákváðum við nú bara að gera góð lög og pældum ekkert of mikið í því hvað við værum að gera.“

„Vinur minn sagði mér að það væri svipaður fílingur í okkur og í The Cardigans, en samt ekki endilega svipaðar lagasmíðar. Ég hef annars verið að hlusta ógeðslega mikið á Dylan upp á síðkastið og líka á nýju Emilíönuplötuna,“ segir Rósa.

„Ég hef nú aldrei gefið út plötu nema einhver segi hana eins og Bítlana. Ætli maður sé ekki bara fastur í sínum gömlu áhrifavöldum,“ segir Einar.

Feldberg-dúettinn segir að ýmislegt sé „farið að rúlla“ í útrásarbrasi hljómsveitarinnar en að auglýsingalega sé platan „mett“ (tvö lög af henni eru notuð í auglýsingum). Allt er í gangi: „Það er komið flott band í kringum þetta og öllum finnst bara ógeðslega gaman,“ segir Rósa. Útgáfutónleikarnir verða í Þjóðleikhúskjallaranum upp úr miðjum nóvember.drgunni@frettabladid.is