Einhver vírus að ganga í Manchester United liðinu

Kóreumaðurinn Park Ji-sung getur ekki verið með Manchester United á móti Wolfsburg í Meistaradeildinni á morgun þar sem hann er með vírus. Patrice Evra er hinsvegar orðinn góður af sínum veikindum. Það er því einhver vírus að ganga innan United-liðsins.

„Ji-sung er með vírus," sagði Sir Alex Ferguson, stjóri Manchester United. "Patrice Evra var með samskonar vírus um helgina og leið illa eftir Stoke-leikinn. Hann lá fyrir á sunnudaginn en leit við á æfingu á mánudaginn og æfði síðan með okkur í dag. Hann ætti að vera orðinn góður," sagði Alex Ferguson.

Þótt að stjórinn kalli þetta vírus þá er þetta væntanlega bara einhvers konar flensa en það er þó aldrei gott þegar flensufaraldur fer að geysa innan fótboltaliðs því samvera leikmanna er mikil innan sem utan vallar.