Húsleit gerð hjá Logos í morgun

Menn á vegum Ólafs Þórs Haukssonar sérstaks saksóknara vegna bankahrunsins gerðu í morgun húsleit á lögfræðistofunni Logos í Efstaleiti samkvæmt heimildum fréttastofu. Logos er einnig með starfsstöðvar í Kaupmannahöfn og London. Ólafur vildi ekki tjá sig um málið að svo stöddu þegar fréttastofa náði sambandi við hann en staðfesti að húsleit hefði verið framkvæmd í morgun.

Samkvæmt heimildum fréttastofu var einnig gerði húsleit hjá hýsingaraðila rafrænna gagna hjá Logos.

Embætti Ólafs gerði húsleit á 12 stöðum föstudaginn 22. maí vegna rannsóknar á kaupum sjeiksins Al Thani á 5% hlut í Kaupþingi. Húsleitirnar í morgun tengjast því máli en Guðmundur Oddsson, einn lögmanna Logos sat í stjórn Q Iceland Finance sem var í eigu Al Thani.