Harkaleg viðbrögð

Steingrímur J. Sigfússon fjármálaráðherra segir enn óljóst hvað felst í því að Kínverjar hafi ákveðið að kalla sendiherra sinn heim frá Íslandi vegna komu Dalai Lama, trúarleiðtoga Tíbeta. Hann segist lítið hafa frétt af málinu þótt hann hafi heyrt það í gærkvöldi að sendiherrann hafi sjálfur upplýst að hann væri á heimleið. Sendiherrann neitaði því í samtali við fréttastofu í gærkvöldi í framhaldi af því að Ríkisútvarpið greindi frá því að hann væri á heimleið.

Steingrímur segist ekki vita hversu afdráttarlaus aðgerðin er og að ýmislegt komi til greina. Mögulega sé hann aðeins á leið heim til skrafs og ráðagerða við yfirmenn sína og væri hægt að líta á það eitt sem díplómatíska aðgerð. Annar möguleiki sé að Kínverjar hafi ákveðið að skipta um sendiherra, mögulega vegna óánægju með frammistöðu hans. Þriðji möguleikinn væri síðan að Kínverjar hefðu ákveðið að loka sendiráðinu hér til frambúðar.

Steingrímur segir að nú þurfi að koma því á hreint á hvaða stigi málið sé. Hann segir Kínverja bregðast við af mikilli hörku og úr takti við tilefnið. Hann segist ekki kannast við að sendiherrar hafi verið kallaðir heim frá Danmörku eða Frakklandi þar sem Dalai Lama var áður en hann kom hingað til lands. Þá segir Steingrímur að framhald málsins verði í höndum utanríkisráðherra, Össurar Skarphéðinssonar, en ekki náðist í hann í morgun.