Forsætisráðherra hringdi í nöfnu sína

Þrjátíu og fjögur lönd af fjörtíu og tveimur sem greiddu atkvæði í Söngvakeppni evrópskra sjónvarpsstöðva í gærkvöldi, gáfu íslenska laginu stig og tryggðu Jóhönnu Guðrúnu þannig annað sætið í keppninni.

Forsætisráðherra hringdi í nöfnu sína í gærkvöldi og óskaði henni til hamingju og forsetahjónin sendu henni og fylgdarliði hamingjuóskir sínar.

Þrjú lönd, Malta, Írland og Noregur gáfu lagi Jóhönnu Guðrúnar, Is it True, tólf stig í Söngvakeppni Evrópu í gærkvöldi. En í æsispennandi stigagjöf barðist Jóhanna við Aserbaídsjan um annað sætið í keppninni.

Svíar gáfu íslenska laginu tíu stig en í vefútgáfu Svenska dagbladet í gærkvöldi var Norðmönnum óskað til hamingju með sigurinn og jafnframt fullyrt að íslenska lagið hafi verið best. Norska lagðið sigraði keppnina með yfirburðum og sló stigamet í keppninni með 387 stig. Ísland var með 218 stig í öðru sætinu og Aserbaídsjan í því þriðja með 207 stig. Norska þjóðin fær sigurinn í þjóðhátíðargjöf, því þjóðhátíðardagur þeirra er í dag og verður Alexander Rybak því vafalaust fagnað sem þjóðhetju þegar hann kemur heim til Noregs í dag.

Árangur Jóhönnu er að minnsta kosti jafngóður ef ekki betri en árangur Selmu Björnsdóttur sem einnig varð í öðru sæti í Eurovision árið 1999. Selma fékk 146 stig á sínum tíma en Jóhanna 218 stig eins og áður sagði og hefur Ísland aldrei fengið fleiri stig í keppninni.

Forseti Íslands Ólafur Ragnar Grímsson sendi í gærkvöldi Jóhönnu Guðrúnu, höfundum og flytjendum íslenska lagsins hamingjuóskir frá sér og Dorrit. Í kveðjunni sagði forseti einnig að íslenska þjóðin samfagnaði þeim innilega og væri afar stolt af árangri þeirra. Jóhanna og fylgdarlið hennar eru væntanleg heim til Íslands síðar í dag.