Dagur vill sátt við stéttarfélög vegna arðgreiðslna

Oddviti Samfylkingarinnar í Reykjavík, Dagur B. Eggertsson, vill ná sáttum við stéttarfélögin sem hafa gagnrýnt stjórn Orkuveitunnar fyrir 800 milljón króna arðgreiðslu á sama tíma og starfsfólk þarf að gangast undir launalækkun.

Í tilkynningu sem hann sendi frá sér segir Dagur að deilan sem nú er sprottin upp sé að hluta til samskiptaleysi við borgaryfirvöld að kenna.

Þetta samskiptaleysi er farið að trufla aðdraganda viðræðna um stöðugleikasáttamála á vinnumarkaði, að sögn Dags.

Dagur segir síðan orðrétt:

„Það hlýtur að teljast lykilatriði að borgarstjóri og forysta borgarstjórnar skýri sjónarmið sín fyrir mikilvægum viðsemjendum á vinnumarkaði í stað þess standa í deilum í fjölmiðlum eða hlaupast undan því að skýra afstöðu Reykjavíkurborgar á opinberum vettvangi, einsog nú virðist því miður vera raunin. Þess má geta að borgarstjórn samþykkti síðast liðið haust að haft yrði náið samráð við stéttarfélög af hálfu aðgerðarhópsins."

Þarna vitnar hann í frétt Stöðvar 2 í gær sem sagði frá því að Hanna Birna Kristjánsdóttir vildi ekki tjá sig við fjölmiðla vegn arðgreiðslumálsins.

Hér má lesa tilkynningu Dags orðrétta:

Oddviti Samfylkingarinnr í Reykjavík og fulltrúi í aðgerðarhópi borgarstjórnar vegna breytinga í atvinnu- og efnahagslífi hefur óskað eftir því að efnt verði til funda með fulltrúum stéttarfélaga við fyrsta mögulega tækifæri. Tilefnið eru deilur um arðgreiðslur Orkuveitu Reykjavíkur í borgarsjóð. En þar virðist þögn - og samskiptaleysi borgaryfirvalda - vera farin að trufla aðdraganda viðræðna um stöðugleikasáttamála á vinnumarkaði, líkt og fram hefur komið í fjölmiðlum. Slíkur sáttmáli er einn af hornsteinum efnahagsstefnu nýrrar ríkisstjórnar og skiptir lykilmáli til að ná samstöðu þjóðarinnar um leðir út úr kreppunni.

Það hlýtur að teljast lykilatriði að borgarstjóri og forysta borgarstjórnar skýri sjónarmið sín fyrir mikilvægum viðsemjendum á vinnumarkaði í stað þess standa í deilum í fjölmiðlum eða hlaupast undan því að skýra afstöðu Reykjavíkurborgar á opinberum vettvangi, einsog nú virðist því miður vera raunin. Þess má geta að borgarstjórn samþykkti síðast liðið haust að haft yrði náið samráð við stéttarfélög af hálfu aðgerðarhópsins. Engin sameiginlegur fundur hefur þó verið haldinn, þrátt fyrir ítrekaðar óskir þess efnis af hálfu fulltrúa minnihlutaflokkanna í borgarsjtórn.

Formleg beiðni um samráð við stéttarfélög sem sent var formanni aðgerðarhóps Reykjavíkurborgar fylgir hér með:

"Ég fer þess eindregið á leit að fulltrúar stéttarfélaga verði kallaðir til samráðsfundar með aðgerðahópi borgarstjórnar. Gert er ráð fyrir slíku samráði í aðgerðaráætlun borgarinnar sem samþykkt var síðast liðið haust en af því hefur því miður ekki orðið. Hefur þó ítrekað verið kallað eftir samráði við stéttarfélög á fundum aðgerðarhóps af hálfu fulltrúa minnihlutaflokkanna í borgarstjórn. Í stað þess að efna til reglulegra samráðfunda virðast stéttarfélög hins vegar mæta þögn af hálfu borgarstjóra og meirihluta borgarstjórnar.

Ef marka má fjölmiðla er nú svo komið að vond - eða engin - samskipti Reykjavíkurborgar og stéttarfélaga virðast vera farin að trufla aðdraganda viðræðna um víðtæka þjóðarsamstöðu um stöðugleikasáttmála á vinnumarkaði. Það væri mikið slys. Ef einhver tímann var nauðsyn um að ná breiðri samstöðu um leiðina út úr kreppunni, þá er það við núverandi aðstæður, einsog ný ríkisstjórn hefur undirstrikað. Minnt er á að fyrstu formlegu fundir um stöðugleikasáttamálann eru ráðgerðir á þriðjudag nk. og því er mikilvægt fundum verði komið á hið fyrsta. Það mætti til að mynda gera á fundi aðgerðarhóps, á morgun, mánudag.