Árni sakar samherja um skipulagða aðför - Kjartan neitar

Kjartan Ólafsson, sem var fimmti maður á lista Sjálfstæðisflokksins í Suðurkjördæmi fyrir alþingiskosningarnar, segir í samtali við Sunnlending.is að Árni Johnsen fari með fleipur ef hann haldi því fram að hann hafi unnið gegn sér i aðdraganda kosningana. Árni fullyrðir í viðtali við Fréttir í Vestmannaeyjum að frambjóðendur Sjálfstæðisflokksins af Árborgarsvæðinu hafi hvatt kjósendur til að strika yfir nafn sitt í kosningunum.

Árni tilgreinir engan sérstakan frambjóðanda en segir hins vegar að markviss vinna gegn sér af hendi félaga hans á framboðslistanum og í flokknum hafi valdið því að 17% kjósendu strikuðu yfir nafn hans. Kjartan Ólafsson er efsti maður á lista yfir þá sem búa á Árborgarsvæðinu

„Hvað mig varðar eru þessar ásakanir algjör fjarstæða. Svona myndi ég aldrei vinna og ég veit ekki hvað Árna gengur til með þessu. Ástæður þess að hann fékk margar útstrikanir er líklega bara að leita hjá honum sjálfum og því gæfulegast fyrir hann að finna skýringar þar," segir Kjartan Ólafsson.

Árni Johnsen féll niður um eitt sæti á lista Sjálfstæðisflokksins í Suðurkjördæmi vegna útstrikana. Unnur Brá Konráðsdóttir færðist því upp fyrir hann á listanum.