Markmiðið að ná trausti fólksins aftur

„Þetta er náttúrlega vilji kjósenda og maður þarf bara að taka því. Þetta er búið að vera ansi erfiður vetur þannig að markmið mitt er bara að ná trausti þessa fólks aftur," segir Guðlaugur Þór Þórðarson um niðurstöðu varðandi útstrikanir á lista Sjálfstæðisflokksins í Reykjavíkurkjördæmi suður. Samkvæmt niðurstöðunni fellur Guðlaugur niður um eitt sæti og verður annar þingmaður Sjálfstæðisflokksins í kjördæminu.

Guðlaugur segir að næsta verkefni sé að undirbúa þingstörfin. „Núna þurfum við sjálfstæðismenn að standa saman og vinna aftur traust og fylgi flokksins. Það er það sem við erum nú þegar byrjuð á," segir Guðlaugur.

Aðspurður hvað Guðlaugi finnist um stjórnarmyndunarviðræður vinstri flokkanna segir Guðlaugur að þeir beri mikla ábyrgð og þurfi að flýta sér. „Það er okkar verkefni að fá að styðja þá í góðum málum, en það sem ég hef áhyggjur af er að nú líður mjög dýrmætur tími og það er dýrt fyrir þjóðina," segir Guðlaugur.

Guðlaugur segir að Vinstri flokkarnir þurfi að hefjast handa sem allra fyrst því að vandamálin framundan séu mikil og hver dagur sé mjög dýr. „Ég hef langmestar áhyggjur af atvinnuleysinu því að ef ekkert verður að gert þá mun það bara aukast. Og það er allt of mikið fyrir," segir Guðlaugur Þór.