Samið um hvern málaflokk fyrir sig

„Við erum að ná samkomulagi innan hvers málaflokks fyrir sig," sagði Steingrímur J. Sigfússon, formaður Vinstri grænna, eftir fund síðdegis með Jóhönnu Sigurðardóttur, formanni Samfylkingarinnar.

Fundinn, sem fram fór í Alþingishúsinu, sátu einnig varaformenn flokkanna og aðstoðarmenn formannanna.

Jóhanna sagði að fyrst og fremst þyrfti að ná niðurstöðu varðandi Evrópusambandið. Ríkisstjórnarflokkarnir hefðu þó tímann fyrir sér enda með meirihluta Alþingis á bak við sig.

Aðspurður um mismunandi áherslur flokkanna á Evrópumál annars vegar og umhverfismál hins vegar sagðist Steingrímur það vitað. „Við þurfum einhvers staðar að mætast í þessum málum.

Það er bara augljóst og það er bara unnið í samræmi við það," svaraði Steingrímur.

„Hér er það svo að við leggjum líka áherslu á umhverfismálin. Þú mátt ekki gleyma því," minnti Jóhanna þá fréttamann á og Steingrímur hló við.

Auk þess sem viðræðuhópur flokkanna tveggja um Evrópumál var skipaður á mánudag tilnefndu flokkarnir í gær tvo fulltrúa hvor í nefnd sem ræða á stjórnkerfisbreytingar. -gar