Vinna við stjórnarmyndun heldur áfram

Vinna við myndun meirihlutastjórnar Samfylkingarinnar og VG heldur áfram í dag. Að sögn Steingríms J. Sigfússonar fjármálaráðherra fundaði stjórnarskrárhópur í morgun. Viðræðustjórnir hvers flokks fyrir sig munu svo hittast um hádegisbil og fara yfir stöðuna eins og hún lítur út eftir þær viðræður sem fóru fram á milli flokkanna í gær.

„Þetta er allt í eðlilegri vinnu. Við erum ekki í neinni tímapressu," segir Steingrímur sem bendir á að ekki hafi neinar dagsetningar verið settar enda sé starfhæf stjórn í landinu. „Við vinnum þetta í rólegheitunum svona meðfram oðrum verkum. Það er nú ýmislegt að leggjast okkur til svona eins og þessi svínaflensuheimsfaraldur," segir Steingrímur og bendir á að fundarhöld sem áttu að vera í morgun hafi verið felld niður vegna vinnu sem tengist þeim faraldri.