Svalaslysið í Ölveri: Gríðarleg geðshræring

„Börnin voru á kvöldvöku þegar svalirnar hrundu," segir Arndís Halla Guðmundsdóttir, en tuttugu börn féllu niður af svölum í Ölveri í Borgarnesi klukkan hálf níu í gærkvöldi. Um er að ræða tólf ára börn í Grundaskóla á Akranesi sem voru í skólaferðalagi. Atvikið átti sér stað á kvöldvökunni þegar tveir nemar fóru út úr húsinu í einum leiknum. Þá þustu börnin tuttugu út á svalir til þess að fylgjast með þeim. Aðeins örfáum sekúndum síðar heyrði Arndís lætin.

„Við kiktum niður af svölunum og sáum þau grátandi, föst í spýtnabrakinu, gargandi," segir Arndís sem er ein af fimm foreldrum sem höfðu umsjón með krökkunum í ferðinni. Hún segir að við fyrstu sýn hafi slysið virst talsvert alvarlegra en raunin varð.

„Það kom einn á móti mér og hélt utan um blæðandi höfuðið," lýsir Arndís hrikalegri aðkomunni. Þá þegar hringdi hún í neyðarlínuna.

Foreldrarnir byrjuðu að hlúa að börnunum og þá sérstaklega barninu sem blæddi úr. Arndís segir að gríðarleg geðshræring hafi gripið um sig í hópnum. Í kjölfarið þurfti að kalla út áfallateymi til þess að hlúa að andlegri líðan barnanna.

Í ljós kom að ekkert barnanna slasaðist alvarlega. Að sögn Arndísar voru það helst áverkar vegna fallsins sem hrjáðu börnin, sum voru tognuð í hálsi, önnur voru með skurði eftir spýtnabrakið. Miðað við að börnin féllu niður um tvo metra með svölunum, þá er það einstakt hversu vel þau sluppu öll frá slysinu.

„Okkur foreldrunum finnst þetta ótrúlegt," segir Arndís um heppni barnanna. Hún segir að sjúkrabílar hafi ekið nokkrum börnum upp á spítala þar sem hlúð var að þeim. Síðan kom rúta að sækja þau börn sem eftir voru. Þeim var ekið heim til sín eftir að þau fengu áfallahjálp.

Sjálf átti Arndís tólf ára strák í ferðinni, þegar blaðamaður spyr hana hvort hann hafi verið á svölunum, svarar hún fegin: „Minn var ekki á svölunum."