Svíar ætla að ræða við Eriksson

Sá möguleiki að Sven-Göran Eriksson taki við sænska landsliðinu hefur ekki verið útilokaður og mun formaður sænska knattspyrnusambandsins ræða við Eriksson um starfið í vikunni.

Formaður sænska knattspyrnusambandsins, Lars-Ake Lagrell, er góður vinur Erikssons.

„Við munum ræða saman í síma á miðvikudag og eftir það símtal veit ég meira," sagði Lagrell en Eriksson er sem kunnugt er í vinnu hjá Notts County.

„Ég veit að Sven myndi elska að sinna þessu starfi. Hann hefur alltaf sagt það. Við verðum samt að bíða og sjá hvað setur því Sven hefur ekki enn heyrt frá sænska knattspyrnusambandinu," sagði nafnlaus heimildarmaður sem á að vera vinur Erikssons.

Það yrði mikið áfall fyrir Notts County að missa Eriksson en honum er ætlað að byggja upp stórveldi hjá félaginu.

Ekki er samt útilokað að Sven starfi áfram fyrir County þó svo hann verði ráðinn landsliðsþjálfari Svía.