Sýnd í fimm borgum og heimsálfum

Kvikmynd Einars Þórs Gunnlaugssonar, Heiðin, verður sýnd í fimm borgum í þremur heimsálfum í nóvember og desember. Myndin ferðast til Indlands þar sem hún tekur þátt í Indian International Film Festival í flokknum Male Voice.

Þetta verður í fyrsta sinn sem íslensk mynd er sýnd á þessari hátíð, sem verður haldin 15. til 22. desember. Heiðin verður einnig sýnd í Scandinavia House í New York í desember. Þar verða níu aðrar íslenskar myndir sýndar í tilefni af þrjátíu ára afmæli Kvikmyndasjóðs Íslands. Að auki verður Heiðin tekin til sýninga á norrænum kvikmyndadögum í Minneapolis í Bandaríkjunum 21. til 23. nóvember ásamt myndunum Skrapp út, Góðir gestir, Bræðrabylta og Síðasti bærinn í dalnum. Sömuleiðis verður myndin sýnd í Kulturhus í Berlín og í kvikmyndahátíð í Terni á Ítalíu þar sem þemað er Fólk og trú.

Með aðalhlutverkin í Heiðinni, sem var frumsýnd hérlendis í fyrra, fara Gunnar Eyjólfsson, Gísli Pétur Hinriksson, Jóhann Sigurðarson og Ísgerður Gunnarsdóttir. Myndin hefur verið sýnd á hinni alþjóðlegu A-hátíð Shanghai International Film Festival og hlotið lofsamlega dóma í hinu virta kvikmyndariti Variety. Leikstjórinn Einar Þór er um þessar mundir að ljúka við gerð heimildarmyndarinnar Norð Vestur, sem segir m.a. frá snjóflóðunum á Vestfjörðum 1995. Á næsta ári mun hann taka sér stutt hlé frá kvikmyndum og skrifa fyrir leikhús, en hann hefur fengið styrk úr leikritunarsjóði Þjóðleikhússins til að skrifa verkið Pinsilon.