Mikil óvissa ríkir um framgang viðræðna

Mikil óvissa ríkir um framgang viðræðna Alþýðusambands Íslands og Samtaka atvinnulífsins. Þetta er fullyrt á vef ASÍ. Í viðræðum samninganefndar ASÍ við fulltrúa Samtaka atvinnulífsins í dag var tekist á um tímasetningar launahækkana í gildandi kjarasamningi.

Á vef Alþýðusambandsins segir að samninganefnd ASÍ hafi gert fulltrúum Samtaka atvinnulífsins grein fyrir því að ekki væri vilji til þess meðal aðildarfélaga ASÍ að fresta launahækkunum frekar en orðið er og hafnaði fyrri tillögum Samtaka atvinnulífsins og hélt kröfu sinni um að launahækkanir kæmu til framkvæmda 1. júlí og 1. janúar næstkomandi til streitu.

„Eftir að hafa tekið sér stuttan umhugsunartíma tilkynnti SA að atvinnurekendur gætu ekki teygt sig frekar í málinu og það kæmi ekki til greina að hækka launataxta um kr. 13.500 eða kr. 17.500 þann 1. júlí n.k," segir á vef ASÍ.

Í ljósi þessa hafa fulltrúar í samninganefnd Alþýðusambandsins ákveðið að funda með sínum samninganefndum eftir helg til þess að fara yfir stöðuna. Því ríki mikil óvissa um framgang þessara viðræðna.

„Ákveðið var að undirnefndir samningsaðila um ríkisfjármál og efnahags- og atvinnumál haldi sinni vinnu áfram eftir hvítasunnuhelgina, a.m.k. þangað til fyrir liggur hvort endanlega slitni uppúr viðræðum ASÍ og SA."