Mikil þörf fyrir hvíldarheimili

Átak til styrktar hvíldarheimili Styrktar­félags krabbameinssjúkra barna hófst í gær. Nefnist það Á allra vörum og byggir á sölu á varaglossum.

Að því er kemur fram í tilkynningu greinast árlega að meðaltali tíu til tólf börn undir átján ára með krabbamein. „Mikil þörf er á hvíldarheimili fyrir fjölskyldur krabbameinssjúkra barna,“ segir í tilkynningu forsvarskvenna átaksins.

Tónlistarmaðurinn Magnús Eiríksson gefur átakinu lagið Von af nýjum geisladiski Mannakorna. „Segir textinn allt sem segja þarf, því vonin er oft það eina sem fólk á sem berst við erfið veikindi eins og krabbamein,“ segir um framlag Magnúsar.

Varaglossin verða seld um borð í vélum Iceland Express í júní og júlí og til 14. júní í Hagkaupum, Lyfjum og heilsu, Hygea og öðrum söluaðilum Dior. Umboðsali snyrtivöruframleiðandans hér á landi, Heildverslun Halldórs Jónssonar, er einmitt aðalstyrktaraðili átaksins ásamt Iceland Express.- gar