Fyrsta löndun Íslendinga í Grimsby í tæp 9 ár

Tæp níu ár voru liðin frá því íslenskt fiskiskip landaði síðast í Grimsby þegar Sturla GK 12 seldi afla sinn þar í gær.

Fjallað er um málið á vefsíðu LÍÚ og þar er vitnað í breska sjávarútvegsvefinn FISHupdate.com sem segir að hin „óvænta koma" Sturlu GK 12 hafi vakið nokkra athygli á fiskmarkaðnum í Grimsby enda aflinn búhnykkur fyrir markaðinn til viðbótar gámasendingum frá Íslandi.

Að sögn fréttavefsins voru landanir íslenskra fiskiskipa algengar á sjöunda og áttunda áratugnum en með tilkomu hagkvæmra gámaflutninga lögðust þessar skipakomur smám saman af.

Alls voru 65 tonn seld úr Sturlu GK í gær en 40 tonn verða seld í dag. Skipið er nú á heimleið. Annað skip Þorbjarnar hf. í Grindavík, Ágúst GK 95, er á leið til Grimsby og mun selja þar nk. mánudag.