Þiggur ekki biðlaun ráðherra

Ásta Ragnheiður Jóhannesdóttir sem í dag var kjörin forseti Alþingis mun ekki taka þriggja mánaða biðlaun ráðherra líkt og hún átti rétt á. Hún segir biðlaun fyrst og fremst ætluð þeim sem hætta í starfi og fá ekki sambærilegt starf. Hún sé nú orðin forseti Alþingis og muni því ekki þiggja biðlaunin. Ásta er mjög ánægð með nýja starfið sem hún segist ætla að sinna af sóma.

„Ég var fyrsti varaforseti áður en ég varð ráðherra og hef því sinnt þessum forsetastörfum áður," segir Ásta í samtali við Vísi.

Í dag vakti nokkra athygli þegar þrír þingmenn Borgarahreyfingarinnar og einn frá VG skrópuðu í Dómkirkjuna við setningu Alþingis.

„Það er hvers og eins að ákveða hvort hann fari í kirkju eða ekki. Þetta er ekki í fyrsta sinn sem þingmenn hafa ekki mætt í kirkjuna, það hefur bara ekki verið gert svona mikið úr því áður."