Bólusetning hafin

Fyrstu skammtarnir af bóluefni gegn svonefndri svínaflensu komu til landsins í morgun og hófst bólusetning heilbrigðisstarfsmanna klukkan fjögur í dag.

Haraldur Briem, sóttvarnalæknir, sagði í samtali við fréttastofu í morgun að næstu daga og fram eftir næstu viku verði það eingöngu heilbrigðisstarfsmenn sem fái bólusetningu. Mjög miklu máli skipti að þeir geti staðið vaktina.

Næsti hópur eru lögreglu- og slökkviliðsmenn, sem og björgunarsveitarmenn, en síðan verður fólk bólusett sem er með undirliggjandi sjúkdóma, og einnig barnshafandi konur. Almenn bólusetning hefst síðan að þessu loknu.

Svínaflensutilfellum hefur fjölgað mjög síðustu daga, einkum á höfuðborgarsvæðinu. Úti á landsbyggðinni hefur hún þó líka verið að sækja í sig veðrið.