Björgunarsveitin aðstoðaði ökumann í nótt

Björgunarsveitir á Dalvík og Tindur Ólafsfirði voru kallaðar út um klukkan hálf átta í morgun þegar tilkynning barst um bíl utan vegar við Ytri-Vík milli Ólafsfjarðar og Dalvíkur samkvæmt tilkynningu frá Landsbjörg.

Bíllinn fór út af veginum á milli klukkan þrjú og fjögur í nótt en ökumaðurinn gat ekki látið vita af sér fyrr en í morgun. Bíllinn var um 15 m neðan vegar og var óstöðugur. Björgunarsveitir tryggðu bílinn á meðan slökkviliðið á Dalvík klippti manninn úr bílnum en einnig voru sjúkrabílar frá Dalvík og Ólafsfirði á staðnum.

Maðurinn var með meðvitund þegar að var komið. Hann var settur í sjúkrabíl og farið með hann á FSA - fjórðungssjúkrahúsið á Akureyri. Ekki er vitað um ástand hans.