Kristín vill vera rektor áfram

Kristín Ingólfsdóttir, rektor Háskóla Íslands, hyggst sækjast eftir því að vera rektor áfram en skipunartími hennar rennur út á næsta ári. Þetta kom fram í máli Kristínar á fundi með starfsmönnum í hádeginu.

Rektor Háskóla Íslands er kosin til fimm ára í senn og hefur Kristín gegnt stöðunni frá 2005 þegar hún tók við af Páli Skúlasyni. Kristín var áður prófessor við lyfjafræðideild skólans.

Í rektorskjörinu fyrir fjórum árum gáfu fjórir kost á sér. Tveir helltust úr lestinni í fyrri umferð kosninganna en í seinni umferðinni var kosið á milli Kristínar og Ágústs Einarssonar, þáverandi deildarforseta viðskipta- og hagfræðideildar skólans og núverandi rektors á Bifröst, og bar Kristín sigur úr býtum.