Boða til mótmælafundar vegna brottvísun flóttamanna

Hópur sem kallar sig Flóttamannahjálpin boðar til mótmælafundar á Lækjartorgi í hádeginu á morgun undir yfirskriftinni: „Niður með rasisma, niður með Útlendingastofnun!"

Hópurinn er ósáttur eð að þremur flóttamönnum frá Írak og Afganistan hafi verið vísað úr landi og sendir til Grikklands í gær. Brottvísun fólksins var mótmælt í gærkvöldi við lögreglustöðina á Hverfisgötu og við heimili Rögnu Árnadóttur, dómsmála- og mannréttindaráðherra.

Rætt var um málið á Alþingi í dag að frumkvæði Önnu Pálu Sverrisdóttur, varaþingmanns Samfylkingarinnar, og sagði Ragna brottvísun fólksins vera byggð á lögum og almennum mælikvörðum. Ekki væri um að ræða geðþóttaákvörðun ráðherra.