Ríkið eða kröfuhafar munu ákveða afskriftir starfsfólks

Nýir eigendur Íslandsbanka taka ákvörðun um hugsanlega afskrift lána sem Glitnir veitti starfsmönnum til hlutabréfakaupa í bankanum á sínum tíma. Stjórn Íslandsbanka hefur fram til þessa látið málið vera og beðið eigendaskipta, samkvæmt heimildum Fréttablaðsins.

Lán Glitnis til fyrrverandi og núverandi starfsmanna bankans hleypur á milljörðum króna. Frá því hefur áður verið greint að þrír framkvæmdastjórar bankans fengu í maí í fyrra lán upp á átta hundruð milljónir hver til kaupa á hlutabréfum í bankanum. Lán starfsmanna bankans eru flest í einkahlutafélögum sem standa illa í dag og teljast því sem næst glötuð.

Vitað er að einhverjir starfsmenn Íslandsbanka hafa í samræmi við samninga nýtt sér söluréttarákvæði sem viðkomandi höfðu. Í þeim tilvikum sem lántakar áttu samningsbundinn rétt til að falla frá kaupunum eða sölurétti hafa þeir almennt nýtt sér hann á gjalddaga lánanna, samkvæmt upplýsingum frá Íslandsbanka.

Í dag skýrist hverjir eignast Íslandsbanka en þá rennur út frestur kröfuhafa Glitnis til að ákveða hvort þeir vilja fá 95 prósenta hlut í honum eða skuldabréf.

Verði seinni leiðin valin eignast ríkið Íslandsbanka að fullu en bankinn mun gefa út þrjú skuldabréf stíluð á kröfuhafa. Fyrsta skuldabréfið er upp á 52 milljarða króna. Hin tvö eru árangurstengd og geta aldrei orðið hærri en áttatíu milljarðar króna. Ásamt því fá kröfuhafar kauprétt á níutíu prósenta hlut í bankanum.

Verði fyrri leiðin valin mun skilanefnd Glitnis taka yfir stjórn bankans fyrir hönd kröfuhafa og setja fjóra menn í bankaráð til móts við einn sem ríkið tilnefnir.

„Við erum að fara í gegnum lokaatriðin,“ segir Árni Tómasson, formaður skilanefndar Glitnis, og bætir við að enn sé ekki vitað hverjir kröfuhafar Glitnis eru. Hann vísar til þess að líflegur markaður hafi verið með kröfur bankans frá því hann féll fyrir rúmu ári. Sama máli gegnir um kröfur Kaupþings.

Kröfulýsingafresti í bú Glitnis lýkur 26. nóvember næstkomandi en 30. desember í bú Kaupþings. Á þeim degi mun koma í ljós hverjir eigendur bankans eru. - jab