Með einkabryggju í Stafangri

Rokkarinn Bjarni úr Mínus og Hrefna Björk, útgáfustjóri Mónitors, eru meðal þeirra Íslendinga sem ákváðu að freista gæfunnar í Noregi í kjölfar efnahagshrunsins. Þau kunna vel við sig á nýjum stað.

„Okkur líður rosalega vel hérna. Norðmenn eru svo hjálpsamir og liðlegir, og boðnir og búnir til að aðstoða mann við allt. Dóttir okkar er komin á fínan leikskóla og Bjarni vinnur að tónlistinni. Hér eru líka margir Íslendingar þannig að maður hefur félagsskap samlanda sinna hér líka,“ segir Hrefna Björk Sverrisdóttir, fyrrverandi framkvæmdastjóri Media sem gefur út Mónitor.

Hrefna flutti í haust til Stafangurs ásamt sambýlismanni sínum, Bjarna Sigurðarsyni í Mínus, og þriggja ára dóttur. Hrefna Björk rekur tískuverslunina Air í miðbæ Stafangurs og segist vera farin að geta bjargað sér á norskunni. „Þar sem ég vinn í búð byrjaði ég strax að reyna að klóra mig fram úr norskunni. Tungumálið er reyndar rosalega líkt íslensku þannig að þetta er lítið mál og ef ég er í vafa þá prófa ég bara íslenskuna og í flestum tilvikum skilur fólk hvað ég á við.“

Hrefna segir Stafangur þekktan fyrir að vera skemmtanabærinn í Noregi, en segist sjálf lítið hafa kíkt á næturlífið síðan þau fluttu í bæinn. Fjölskyldan leigir hús við ströndina og því fylgir lítil einkabryggja sem þau hafa afnot af. „Þetta er svaka fínt, maður getur farið út á sjó og veitt sér humar eða fisk til matar,“ segir Hrefna.

Upphaflega ætlaði fjölskyldan aðeins að dvelja í Noregi fram að jólum en þau hafa ákveðið að framlengja dvöl sína um óákveðinn tíma. „Okkur finnst svo gott að vera hér. Hér er auðvelt að finna vinnu, launin eru góð, Norðmennirnir almennilegir og í augnablikinu erum við ósköp fegin að vera laus við kreppuna. Við ætlum okkur þó ekki að vera hér til frambúðar, við komum aftur heim og þar viljum við búa.“ sara@frettabladid.is